O Consello da Xunta aproba o orzamento para construír o auditorio de Lugo

Despois de seis anos de xestións entre os que houbo que buscar un novo emprazamento, a cidade de Lugo está máis preto de ter o seu auditorio. O consello da Xunta axustou hoxe o orzamento ao calendario de construción do edificio. O presidente Núñez Feijóo, que lembrou que no ano 2004 xa asinara un convenio para facer o auditorio, anunciou que neste verán se licitará a obra por importe de 13.4 millóns de euros.

Un taller audiovisual abre o programa Creativa 2010

“O retrato filmado #02, o retrato memoria” é o nome co que se inicia Creativa 2010, o programa de creación transfronteiriza con base cultural no que traballa tanto Agadic como a Direccão Regional de Cultura do Norte. Esta primeira actividade intégrase dentro da programación de Play-DOC, o festival de documental de autor que se desenvolve estes días en Tui e supón tanto proxeccións (película colectiva Ida e volta) como concertos (o grupo portugués La Batida). Outras iniciativas que se integran dentro de Creativa 2010 son o Festival de Cans (O Porriño), o I Foro Galego-Portugués de Clown e Novo Circo (A Estrada), a exposición Camiño Sonoro (Ourense), accións de danza en Pontevedra ou unha nova edición do foro empresarial sectorial como o que se desenvolveu no outono pasado en Vigo.

Obras de Buciño e Violeta culminan o roteiro Fiz Vergara Vilariño

Oito meses de traballo, trece artistas e os versos do poeta Fiz Vergara Vilariño. Estes son os ingredientes do roteiro que recuperar artística e literariamente os lugares que marcaron a vida e a obra do poeta samoense. A iniciativa, a cargo da Asociación Cultural Ergueitos de Sarria e a Asociación de Escritores en Lingua Galega, chantou obras de artistas como Primitivo Lareu, Mónica Alonso, Paco Pestana ou Manuel Caamaño en lugares destacados da vida do poeta. O roteiro inaugúrase oficialmente hoxe ás 17.00 h. en Aira Padrón, desde onde partirá un percorrido polo trazado.

Linho do Cuco presenta nun concerto o seu novo álbum

Aínda que é o seu segundo traballo, Linho do Cuco decidiu chamarlle III ao seu novo disco. A obra achega unha selección de temas tradicionais pasados pola peneira da banda, cun estilo bailable e festeiro. A gravación do proxecto comezou o pasado 5 decembro, e inclúe instrumentos como o acordeón diatónico ou a zanfona. O Salón Teatro de Compostela acolle esta noite, dentro do ciclo ST Música Presente, un concerto que servirá para que a banda dea a coñecer os temas incluídos neste traballo.

Catedral sonora

En pleno ano Xacobeo, a Catedral de Santiago recupera un dos sons tradicionais: o da carraca. É o substituto das campás nos actos litúrxicos do Triduum Sacrum, ou o que é o mesmo, o único son que se vai escoitar entre o Xoves Santo e a misa de Resurrección (na noite do Sábado Santo). “Hai máis de corenta anos que a Catedral de Santiago non fai sonar a carraca” apuntou o xerente do Consorcio, Xosé Manuel Villanueva, que aludiu á recuperación do patrimonio inmaterial da Catedral. A actuación, financiada polo Consorcio e o Xacobeo, tivo un coste de 54.000 euros e implicou a construción dunha réplica exacta da carraca orixinal que se recuperará para a súa exposición museística.

Observación: Crise e cultura

A industria cultural está a sortear, con máis ou menos fortuna, a crise económica. Cando menos así se desprende dos datos que manexa o Observatorio da Cultura Galega do Consello da Cultura. En xeral, nin o emprego nin a facturación das empresas descenden de xeito destacado. A excepción, e importante, é o audiovisual, que viu no último ano unha drástica diminución, tanto de espectadores como de produción. Canda a isto, a edición galega ve diminuír tamén a súa actividade.

LugoPatrimonio analiza a pegada do ferro en Galicia

Desde a época castrexa ata a fábrica de Sargadelos, o ferro deixou unha pegada importante na nosa cultura. Agora, o colectivo LugoPatrimonio dedícalle a este material o Ciclo do Ferro, unha serie de conferencias, encontros e excursións a enclaves de importancia neste campo. Onte unha primeira palestra sobre a Idade do Ferro en Galicia abría o encontro, que continuará o día 27 cunha visita ao Castro de Neixón e outros enclaves castrexos da costa. As actividades continuarán o vindeiro mes de agosto, centradas nesta ocasión na industria de Sargadelos, e en outubro abordaranse as ferrarías tradicionais da Pontenova e Riotorto.

Ponte... nas ondas! celebrará os seus 15 anos cun congreso en Vigo

O Verbum - Casa das Palabras, en Vigo e mais a Casa da Cultura de Melgaço acollerán entre o 23 e o 25 de abril o Congreso Internacional Pontes de Cultura, Pontes de Futuro que conmemora 15 anos da iniciativa Ponte... nas ondas. No encontro, diferentes mesas redondas analizarán o impacto deste proxecto na educación de Galicia e Portugal, na universidade, nos medios de comunicación ou na recuperación do patrimonio inmaterial. Conferencias, un concerto a cargo Socorro Lira, Uxía e João Afonso completan o programa

Un colectivo convida a crear unha composición musical coas bucinas das bicicletas

¿Apetéceche dar un concerto? Pois se tes unha bicicleta con bucina, camisa branca e pantalón negro, o vindeiro domingo debes presentarte ás 11 na rúa de Xoán XXIII. Será entón cando os ntegrantes do Taller Atlántico Contemporáneo fagan un ensaio xeral e expliquen como se ha de usar a bucina da bicicleta. A Acción fuxidía para 111 ciclistas, que consiste nun concerto “rodado” ata a praza do Obradoiro, terá lugar ás 12:00 horas deste domingo. Mauricio Kagel explica neste vídeo as claves desta singular actividade.

O Museo Galego da Marioneta e a Asociación Tarabela celebran o Día Mundial do Títere

O vindeiro 21 de marzo celébrase o Día Mundial do Títere. O Museo Galego da Marioneta (Manuel Rivero 1, Lalín) xunto coa Asociación Cultural Tarabela festéxano con marionetas. En tres pases (19:00, 20:30 e 22:00 horas) poderase ver o espectáculo África: unha mirada a través do microteatro co que a compañía Zeroalaizquierda conta a historia deste continente.

Política Lingüística lidera un proxecto sobre a diversidade cultural no Camiño de Santiago

Unha rede europea de axentes culturais, congresos e encontros sobre as linguas e as culturas de Europa, unha exposición itinerante ou un portal sobre a historia cultural das rexións vencelladas ao Camiño de Santiago. Estas son as principais liñas de traballo do programa Camiño das culturas e das linguas. Diversidade cultural e lingüística no Camiño de Santiago que presentaba esta mañá Anxo Lorenzo, secretario xeral de Política Lingüística. O seu departamento lidera este proxecto, que apoia a Comisión Europea e que conta cun orzamento de 353.000 euros. Diferentes colectivos de apoio á diversidade lingüística e cultural participan da iniciativa.

Feijóo confirma os prazos da Cidade da Cultura para este Xacobeo

Tal e como estaba xa anunciada, neste ano 2010, abriranse a biblioteca, o arquivo e o edificio de servizos centrais da Cidade da Cultura. Así o corroborou onte no Parlamento o presidente, Alberto Núñez Feijóo, no marco do debate sobre o Estado da Autonomía. Unha primeira sesión na que non se fixo ningunha mención ao sector audiovisual (si á modificación da Lei da CRTVG que xa iniciou o seu traballo) malia que é declarado estratéxico por lei. Pola súa banda, na sesión de hoxe, o BNG solicitou a retirada do Decreto do Plurilingüismo alén de denunciar os descensos dos orzamentos de normalización lingüística (nun 20%) e políticas culturais (15%). Pola súa banda, os socialistas volveron demandar que se defina a política cultural dun departamento ao que cualificaron de “surrealista”.

Luís Tosar presenta Os Crebinsky, o seu último filme

Miguel de Lira, Sergio Zaerreta e Luis Tosar protagonizan Os Crebinsky, unha produción integramente galega que se presentou oficialmente onte en Lugo. O proxecto, producido por Zircozine (produtora que teñen Tosar e Farruco) contará cunha estrea peculiar, xa que contará a proxección con actuacións en vivo da banda dos Crebinsky que intepretará a banda sonora da película e na que Tosar participará de xeito intermitente. Unha particular estratexia de promoción coa que pretenden “facer ruído”, en palabras de Tosar, para poder chamar a atención das distribuidoras e o filme poida verse en salas no outono.

Clase de pilotos

O IES Audiovisual de Vigo é o ultimo centro educativo en materia audiovisual en saír á escena no noso país. E os alumnos do centro presentan hoxe dous capítulos piloto para series e ficción que poñen a disposición de produtores e televisións para o seu desenvolvemento. A Clínica narra as aventuras dun grupo de científicos dirixidos polo estravagante Dr. Álvarez, mentres que Os clocló é unha peculiar familia que ten a súa peculiar receita contra a crise: vivir a conta do resto. As dúas se0ries, das que te ofrecemos un adianto, son a carta de presentacion da nova fornada de creadores.

Nace 2.0 Editora, un proxecto que combina soportes dixitais e tradicionais

A libraría Couceiro de Compostela acolle mañá ás oito da tarde a presentación de 2.0 Editora. Este novo proxecto nace coa intención de "converter ao lector no centro do universo editorial", e para isto quere combinar a edición en papel cos soportes dixitais, tanto para lectura en pantalla e libro electrónico como para ouvir. Para comezar, presentan na colección de narrativa Mundos a Guía do autostopista galáctico de Douglas Adams, e Sen novas de Gurb, de Eduardo Mendoza. Nesta mesma serie no seu web adiantan a edición de O home que era xoves de G.K. Chesterton. Un idioma preciso, de Xusto Rodríguez Río abre a colección Folcsonomías centrada en ensaios sobre comunicación. A firma adianta tamén que oferta os seus servizos para a autopublicación dos autores interesados.

Benvidos a Elsinor

“Hai tantas obras, ideas e versións de Hamlet que xa non é de Shakespeare, senón de todos por iso, me gusta especialmente o nome de Elsinor, cidade na que está o castelo de Kronborg no que vive Hamlet”. Bea Bravo explica así o título da sección na que pretende ser un “espazo de encontro entre o público e o que fun vendo nos espectáculos”. Bravo, actriz de dobraxe e de ficción, achegará aos espectadores as estreas das producións escénicas galegas. Arranca a súa sección con Pressing catch, o último espectáculo para adultos de Berrobambán.

A edición galega de Stratos, de Miguelanxo Prado, xa ten data

O 28 de maio a FNAC da Coruña acollerá a presentación da edición galega de Stratos de Miguelanxo Prado. Este é o primeiro álbum do autor que se poderá ler na nosa lingua, da man de El Patito Editorial. A firma adianta tamén que o 23 de abril, Día do Libro, a Compostelá libraría Couceiro acollerá a presentación de As dúas viaxes de Xaquín Marín. Para maio tamén retornará aos quioscos a revista Galimatías, con series como as xa anunciadas A mansión dos murmurios ou Causas Nobres. Ademais, El Patito adiante que está a traballar na vindeira publicación en galego e castelán de Dick Turpin, obra de Santiago Martín Salvador con guión de Víctor Mora. A maiores, en Compostela a partires de de abril a Fundación Torrente Ballester acollerá unha exposición sobre a obra Peter Petrake e a Biblioteca 33 de Caixa Galicia outra mostra sobre Aventura no Camiño de Santiago.

Historias do real

Son dúas das referencias do documental contemporáneo. Dunha banda, Jay Rosenblatt (Nova York, 1923), creador con estilo propio que ten unha capacidade particular para contar historias a través de imaxes de arquivo; da outra, Raymond Depardon (Villefranche-sur-Saône, 1942), fotógrafo membro da Axencia Magnum que chega ao documental na procura dun traballo directo, honesto que se vai convertendo máis plástico e estético co paso do tempo. Os dous estarán presentes na VI edición do Play Doc que arrinca hoxe en Tui.

A Deputación da Coruña convoca un certame de BD sobre igualdade

Un cadriño ou unha tira de catro cun mesmo fío conductor. Estes son os formatos que se poden presentar ao Concurso viñetas cómic A Medias, que organiza a Deputación da Coruña e que vai dirixido a autores de entre 12 e 18 anos. A temática das historias terá que estar relacionada con cuestións de igualdade, como o reparto de tarefas no fogar, a conciliación da vida familiar e laboral ou a igualdade de oportunidades laborais. O gañador farase cun ordenador portátil e mais unha colección de cómics. O prazo de presentación está aberto ata o vindeiro oito de maio.