Novas | 1 a 10 de 2953

Siguiente >>

22/05/2017
A metraxe atopada protagonizará a nova edición do (S8)

O Concello da Coruña acollía a pasada semana a presentación da nova edición do (S8) Mostra de Cinema Periférico. A cidade acollerá entre o 31 de maio e o 4 de xuño a oitava xeira do festival que nesta ocasión terá como protagonista o "found footage" ou metraxe atopada. Joseph Cornell, considerado o pai deste xénero, que recicla imaxes xa filmadas para lles outorgar novos significados mediante a montaxe, protagonizará unha homenaxe baixo o título Obxectos e aparicións. Canda ao seu traballo poderán verse traballos de Céline Fontaine, Luther Price. O programa Found sounds, protagonizado por Barbara Meter e un obradoiro sobre esta técnica a cargo de María Cañas completan este apartado do programa.. Amplía a nova>>

22/05/2017
Novos documentais galegos saltan á rede

Está a ser cada vez máis común que, logo dun tempo desde a súa presentación, diferentes documentais realizados no noso país se liberten na rede para permitir a súa libre visualización. Foi o caso recente do recoñecido Fíos Fóra, que Illa Bufarda colgou íntegro con ocasión do pasado oito de marzo. Coma este, nas últimas semanas novos proxectos están a chegar á rede, como é o caso dos documentais Patrimonio Habitado e De porta en porta. Estes filmes de carácter etnográfico fan parte do proxecto de investigación Patrimonio do Xurés e permiten coñecer mellor o rico legado material e inmaterial desta zona da man da cooperativa MaOS, de Feitoría Verde e de Illa Bufarda.. Amplía a nova>>

18/05/2017
O festival de jazz de Pontevedra engade o cine para celebrar o 25 aniversario

O Festival Internacional de Jazz e Blues de Pontevedra celebra os seus vinte e cinco anos engadindo ás súa oferta musical un ciclo de cinema que irá quentando o ambiente musical da cidade durante o mes previo ao inicio dos concertos. A proxección o vindeiro 24 de maio da película de Louis Malle Ascensor para o cadafalso dará o pistoletazo de saída do ciclo Notametraxes, que aspira a reflectir algúns dos aspectos máis salientables da relación establecida entre o jazz e o cinema ao longo do século pasado. Cinco proxeccións compoñen o programa ata o 14 de xuño. Todas elas con música en directo a cargo do Seminario permanente de Jazz ao rematar o audiovisual e no caso das dúas derradeiras proxeccións o acompañamento en directo terá lugar durante as proxeccións de dúas películas dos anos 20 de Joris Ivens. As sesións terán lugar todas no Teatro principal de Pontevedra e serán de balde.. Amplía a nova>>

15/05/2017
Estréase Castelao, do chumbo á verba

O Pazo da Cultura de Pontevedra acollerá a estrea, este sábado 20 de maio ás 20:00h., do documental "Castelao: de chumbo a verba". O documental está dirixido por Miguel López e céntrase nos vinte anos de estadía do emblemático artista e político na vila de Pontevedra. O documental está protagonizado por Miguel Pernas, que se introduce no papel de Castelao, e Iago Novoa, un rapaz que está a estudar e ten que realizar un traballo na escola sobre o artista. A produción do documental levou máis dunha década. . Amplía a nova>>

10/05/2017
A XII Mostra de Cinema Etnográfico proxectará trinta filmes en Compostela

A Mostra de Cinema Etnográfico que organiza anualmente en Compostela o Museo do Pobo Galego continúa a medrar na súa duodécima edición. Unha trintena de filmes, ademais de dúas sesións de curtametraxes, poderán verse entre o 29 de marzo e o 3 de xuño vindeiros no marco da iniciativa. Destas, dezaseis producións foron seleccionadas para a sección oficial, entre elas propostas galegas recentes como Entrar aos Vilares, O Moredo. A resistencia do Entroido Ribeirao ou Esquece Monelos. O programa inclúe a habitual proxección dos filmes premiados no Festival de Documental Etnográfico Espiello e achega ademais unha mostra de filmes realizados por mulleres, seleccionados por Xisela Franco e Beli Martínez, e unha sección sobre "Mirada e representación no cinema etnográfico" que coordinou Xosé Carlos Sierra.. Amplía a nova>>

09/05/2017
O festival de Cans presenta o programa audiovisual e musical da XIVª edición

Representantes da Asociación Cultural Arela presentaron hoxe o programa do XIV Festival de Cans. Os organizadores estiveron hoxe acompañados polo director da Axencia Galega das Industrias Culturais, Jacobo Sutil, e mais o delegado da Xunta en Vigo, Ignacio López-Chaves, e os representantes do resto de entidades e empresas colaboradoras. A pesares de que a solicitude de subvención do Festival fora desbotada por un defecto de forma a Xunta de Galicia colabora economicamente co certame grazas a un convenio asinado posteriormente, cunha cantidade menor á da subvención solicitada e non outorgada. Este ano son 16 as curtametraxes seleccionadas na sección oficial a concurso, da que a organización destaca a paridade numérica entre as pezas realizadas por mulleres e por homes, mentres que no apartado de animación presentaranse outras seis curtas cunha forte presenza de novos creadores. Ademais, os videoclips gañan protagonismo, con 19 traballos en competición. En canto ás longametraxes, Cans estreará A historia dun satélite, de Also Sisters, e o documental sobre o naufraxio do Prestixe Mar de fondo, de Dani Guzmán, ademais de contar con Manane Rodríguez para afondar no proceso de realización do seu filme Migas de pan na sección Rebobinando, entre outras proxeccións. No programa deste ano o Festival de Cans reforzará a programación para o xoves 25 de maio, cando terá lugar o habitual concurso de videoclips, convirténdoo nunha xornada na que convivirán o auodiovisual, a música, a gastronomia, a literatura e as artes plásticas con actividade desde a mañana ata a noite.Nesta xornada do xoves 25 tamén se desenvolverá no Bar Liceum do Porriño o I Encontro de realizadores e realizadoras de videoclips do Festival.. Amplía a nova>>

09/05/2017
Constitúese a Fundación Carlos Velo para divulgar a traxectoria do cineasta ourensán

Tras ser aprobado hai case un ano polo pleno do Concello ourensán de Cartelle o inicio do proceso de constitución da entidade e os seus estatutos, por fin ve a luz a Fundación Carlos Velo. A propia alcaldesa de Cartelle, Carmen Leyte, será presidenta desta fundación que ten como obxectivos divulgar a traxectoria vital e profesional do cineasta nacido nesta localidade en 1909 nesta localidade pero que tras exiliarse a México co inicio da Guerra Civil desenvolveu alí unha exitosa carreira, falecendo nese país en 1988. A casa natal do cineasta, que xa fora previamente adquirida polo Concello con este fin, será a sede da fundación que buscará facer dela un referente cultural do eido audiovisual e que terá como presidenta de Honra á neta do cineasta, Laura Gardos Velo. O crítico de cine e profesor universitario; Miguel Anxo Fernández, no cargo de vicepresidente da fundación, ratificou o interese que Carlos velo esperta en foros internacionais e asegurou entender que un dos aspectos máis salientables sobre os que debe traballar a fundación é o documentalismo. Ademais deles na presentación da Fundación Carlos Velo, que se presentou no Liceo de Ourense, tamén estiveron presentes en representación do Padroado o xornalista Xosé Manuel Rodríguez e o xestro cultural Antonio Piñeiro, alén do Presidente da Deputación, Xosé Manuel Baltar. Entre as activades máis inmediatas da Fundación Carlos Velo está a exposición que se presentará en Ourense no outono así como a posible creación dunha bolsa de estudos co nome do cineasta.. Amplía a nova>>

08/05/2017
Un documental galego gaña o II Festival de Cine Arqueolóxico de Castela e León

O documental As pedras de San Lourenzo ergueuse co primeiro premio, o Viriato de Ouro, na categoría documental do II Festival de Cine Arqueológico de Castilla y León, celebrado en Zamora esta fin de semana e organizado por Zamora Protohistórica. O documental, dirixido por Manuel Gago, con fotografía de Sole Felloza, narra o proxecto de intervención no castro de San Lourenzo, na parroquia de Cereira da Pobra do Brollón, e cruza as historias de diferentes veciños con vínculos no castro coa voz dos científicos. Na categoría das curtametraxes gañou "El reino de la Sal. 7000 años de Hallstat". Os Viriatos de prata (segundos clasificados) quedaron para o ducmental "Manos del pasado", da Dirección Xeral de Bibliotecas de Extremadra e "Quivira conquistadors", do norteamericano Teal Greyhavens. . Amplía a nova>>

08/05/2017
Pésame Street e A todo riesgo triunfan no Carballo Interplay

O IV Festival de Contidos Dixitais Carballo Interplay deu a coñecer o pasado sábado o seu palmarés, no que predomina a aposta pola comedia. As webseries Pésame Street e A todo riesgo foron as que concentraron máis galardóns, dous por cabeza, nuns premios moi repartidos entre as producións a concurso. Así, Pésame Street obtivo o de mellor serie de animación e o Premio do Público pola súa fábula de animais parlantes. Pola súa banda, A todo riesgo levou os recoñecementos á mellor webserie de imaxe real, e mais o de mellor actor para Miguel Lago Casal. Teño unha en San Sadurniño fíxose co galardón á Mellor webserie en versión orixinal en galego, mentres o mellor proxecto de webserie en galego foi #HaividaenBran? de Ángela Andrada Gómez, que recibirá 1.500 euros para a produción dos seus tres primeiros capítulos. . Amplía a nova>>

05/05/2017
Trece proxectos reparten as axudas ao talento audiovisual

Cinco proxectos de escrita de guión, cinco de realización de curtametraxes e tres proxectos de longametraxes distribúen os 145.000 euros das axudas para o desenvolvemento e promoción do talento audiovisual galego. A Axencia Galega das Industrias Culturais (Agadic) facía pública onte a resolución desta convocatoria, que lle outorga cadanseus 30.000 euros a aos proxectos de longametraxes 9 fugas, de Fon Cortizo, Ursúas, de Roi Fernánez e Manoliño Nguema, de Antonio Grunfeld. Pola súa banda, os cinco proxectos de curtametraxes, Matria, de Álvaro Gago, A carta xeométrica, de Miguel Mariño, Exhalación, de Alberto Díaz López, Sendeiro, de Lucía Estévez, e Tódalas mulleres que coñezo, de Xiana Gómez-Díaz. levan 6.000 euros cada un. Os cinco proxectos de guión seleccionados recibirán pola súa banda cadanseus 5.000 euros.. Amplía a nova>>

Siguiente >>

Noticias|Reportaxes|Historia|Documentos|Certames|Boletíns|Como estar en AVG |Vantaxes de AVG |Avísanos

AVG | O soportal do audiovisual galego | culturagalega.org


Consello da Cultura Galega
Pazo de Raxoi, 2 andar. 15704 Santiago de Compostela (Galicia)
Tfno: 981957202 / Fax : 981957205 / e-mail: redaccion@culturagalega.org