O poeta noiés, paisano e amigo persoal do músico, representa o gran nivel acadado pola poesía galega no século XX pero ademais posúe unha personalidade que brilla con luz propia na paisaxe poética galega. Os elementos inconfundibles desa paisaxe son a música e a cor. A música, en tanto que a súa poesía ten ritmo e cadencia, nos remite constantemente a temas musicais. A cor, porque a obra é froito e víctima da saudade de ida e volta que provocou en Avilés a emigración durante vinte anos en Colombia, onde casou, traballou e tivo os seus tres fillos. Colombia deixou unha profundísima pegada na obra do escritor, aportándolle unha especial orixinalidade en léxico e temática.

Cantos Caucanos, a producción musical, é o intento de traducción á linguaxe musical esta dupla direccionalidade propia de Avilés de Taramancos, a cordilleira dos Andes e a Ría de Noia, a lírica galega e a paleta de cores da selva colombiana. Tenta combinar pois diversos elementos xa presentes no anterior traballo do músico, “Albeida”, que sorprendeu pola súa novidade e eclecticismo. Recóllense os poemas máis musicais dos seus libros “O tempo no espello” “As torres no ár”, “Cantos Caucanos” e “Ultima fuxida a Harar”.

O elenco de músicos está formado por excelentes profesionais de primeira fila con ampla experiencia no mundo do folk e o jazz galego.

A recuperación da voz orixinal do poeta coa restauración dunha cinta caseira en formato casete que o propio Avilés gravara en Colombia, será acompañada no recitado dun dos seus poemas máis emblemáticos pola Real Filharmonía de Galicia, dirixida por Maximino Zumalave.

O CD Cantos Caucanos sairá á venta no mes de Maio coincidindo coas presentacións.

“Cantos Caucanos”sitúase no horizonte do renacemento do nexo literario-musical, nese punto onde se entreviran poesía e música, lonxe da comercialidade, na procura dunha linguaxe nova que ó mesmo tempo non esqueza os vínculos coa tradición lirico-musical do noso país.