José Castro, máis coñecido como “Chané”, foi un dos máis importantes músicos galegos. Naceu en Santiago de Compostela o 18 de xaneiro de 1856. Era Catedrático de Belas Artes na Coruña. Foi director do “Orfeón Coruñés” e máis tarde da coral “El Eco”. Con esta coral obtivo moitos galardóns pero malia o seu recoñecido prestixio, a cátedra que rexentaba na Coruña foi suprimida, e por esa razón tivo que emigrar. Deste xeito chegou a Cuba en 1893 e alí dirixiu o orfeón “Ecos de Galicia”. Foi mestre de música no “Centro Gallego” e colaborador noutras entidades galegas: “Sociedad de Beneficencia Naturales de Galicia” e na “Asociación Iniciadora y Protectora de la Academia Gallega”. Faleceu na Habana o 27 de xaneiro de 1917.