| |
|
Compostela, capital da lusofonía
Destacados escritores, dramaturgos, cineastas ou músicos
achéganse a Compostela convocados polo congreso "Galego
no mundo-Latim em Pó", que se celebrará dentro
dos actos da Capitalidade Cultural do 2000 en Compostela. Este lugar
pretende servir como foro de debate sobre a situación das
variantes do tronco lingüístico galego-portugués,
que actualmente son empregadas por case 200 millóns de persoas.
Reivindicación do idioma
Segundo sinalou na presentación do encontro Manuel Portas,
concelleiro de normalización lingüística compostelán,
con este encontro preténdese demostrar a validez do galego
para comunicarse no mundo "sen pagar peaxes lingüísticas"
e recuperar a normalidade no intercambio cultural coa área
da lusofonía. Os dous responsables destacaron a intercomprensión
do galego coas demais variedades da súa familia lingüística
coma o portugués, o brasileiro ou as formas africanas e asiáticas.
Segundo Elías Torres, coordinador do encontro, esta semana
"colócanos outra vez no mundo, no centro do mundo afro-luso-brasileiro".
Participantes
Entre
os nomes que estarán en Compostela a semana que vén
poden destacarse algúns como Mia Couto, escritor de Mozambique;
Helder Costa, director de A Barraca de Lisboa; o director de cinema
Luís Filipe Rocha; o cantautor portugués Fausto; o
escritor Suso de Toro; o director do grupo brasileiro Globo, Luís
Erlanguer; a cantante Uxía Pedreira; o dramaturgo Roberto
Vidal Bolaño...
Multidisciplinariedade
Os actos desenvolveranse divididos en seis áreas principais:
cinema, comunidades exteriores, literatura, teatro, medios de comunicación
e música. En cada unha destas áreas, e entre o doce
e o catorce de decembro celebraranse encontros entre creadores e expertos
en cada unha destas áreas, estando programadas ademais a proxección
de películas, representacións teatrais ou actuacións
musicais de varios estilos. O encontro inaugúrase o luns cun
concerto do grupo angolano Kussondulola da discoteca Casting de Compostela,
e rematan o sábado coa celebración na NASA da Ultranoite
Lusofonía, con espectáculos de todo tipo.
Baixa
intensidade e espectáculos sorpresa
Ademais dos encontros e conferencias, nas seccións de teatro,
literatura e música a xornada rematará cada día
con espectáculos abertos. No caso do teatro, ás catro
e media dos días 12, 13 e 14 poderán verse os "Espectáculos
de Baixa Intensidade", que comprenden contacontos, declamacións,
lecturas dramatizadas...
En canto á música, cada día ás sete
da tarde terá lugar unha actuación musical sorpresa
de músicos de toda a lusofonía. Ademais haberá
un concerto as noites do mércores e do xoves, con músicos
de Timor, Guiné Bissau, Mozambique, Angola ou Brasil.
O cinema estará representado por tres películas das
diferentes nacionalidades, ás que seguirán debates
cos directores.
A literatura contará con espectáculos de Orlando Chale,
Zé Rui e Cláudia Campos.
Publicacións
Con ocasión do congreso realizáronse tres publicacións.
Por unha banda,
"Os pousos da pedra", pequeno libro de relatos que
pretende servir como guía de Compostela para os visitantes
e na que participan autores coma Suso de Toro, Xurxo Souto ou Emilio
Cao entre outros. Oito mil exemplares desta publicación serán
distribuidos gratuitamente na cidade.
Por outra banda, editaranse dúas obras resultado da colaboración
de autores de varios países da Lusofonía. Por unha
banda está a narración policiaca "O cránio
de Castelao", en que cada autor escribe un capítulo
e que será publicada por entregas en medios de comunicación
galegos, portugueses e brasileiros.
A outra colaboración será "Do músculo
da boca" obra colectiva na que autores de toda a lusofonía
expoñen as súas reflexións sobre a lingua.
De
balde Tódolos actos do encontro son públicos, agás
os encontros matinais entre os convidados, e de acceso gratuito, previa
retirada de invitación en INCOLSA, na rúa do Vilar. |
