Rematou o encontro "Galego no mundo-Latim em pó", mentres agardamos a publicación das conclusiós finais, os organizadores valoran o acadado, destacando o éxito xeral de público e de contacto.

Na rolda de prensa que sinalou a fin dos encontros, Manuel Portas, concelleiro de Normalización Lingüística do Concello de Santiago, calificou o resultado do encontro de "éxito rotundo" pola necesidade de foros semellante, a orixinalidade da estructura, a calidade dos debates, a alta participación do público e polas propostas de futuro que xurdiron.
Segundo Portas, este foi un dos encontros máis destacados do que se realizaron na cidade este ano, e o único que "partiu dalgo tan básico como a lingua".

Elías Torres, coordinador do encontro, sinalou a importancia dos camiños abertos con este encontro, tanto a nivel de proxectos concretos como de ideas. Segundo el, a sociedade galega ten na lusofonía un inmenso campo aberto e á súa vez moitos países de fala portuguesa descubriron a nosa cultura. Logo de rematado o encontro, Torres manifestou a súa intención de entrevistarse con diferentes axentes culturais para explicar o proxecto e buscar a continuidade do mesmo.
No acto de prentación das conclusións presentouse un manifesto da organización e dos asistentes para pedir ó goberno Mozambicano que esclareza a morte de oitenta e tres prisioneiros en circunstancias non aclaradas e a morte do xornalista Carlos Cardoso. Segundo Elías Torres, Galego no Mundo-Latim em pó xurdiu ademais de como punto de encontro entre persoas como foro de solidariedade entre os países, e ademais do manifesto, acordouse que os beneficios que se obteñan pola venda da obra colectiva "O cránio de Castelao" vaian destiñados a proxectos humanitarios en Mozambique.

Emilio Cao, coordinador da Área de Música sinalou que xurdiron do encontro varios proxectos de gravacións conxuntas e sobre todo un intercambio de ideas e unha boa conexión entre os participantes que, sinalou, marca un jpunto de partida para futuras colaboracións.

Os participantes na Área de Comunidades no Exterior realizaron un manifesto sobre as zonas galegofalantes externas a Galicia reclamando ás institucións o envío de material cultural e o establecemento de canles fluídas de colaboración para fomentar o emprego da lingua nesas áreas.

Con respecto ó teatro, Quico Cadaval sinalou a existencia de dez proxectos que xurdiron deste encontro e nos que están involucrados participantes das diferentes comunidades lusófonas. Segundo el, polo clima que ser respirou nos actos da súa área, estes dez proxectos poderían convertirse en vinte. Entre os contactos destacados que se realizaron na área destacou o de Carlos Alonso, organizador do Festival Internacional de Regueifeiros de Vigo co organizador do Festival Internacional de Repentistas e Declamadores do Nordeste Brasileiro para futuras colaboracións. Quico Cadaval rematou a súa intervensión sinalando que logo destes encontros, o diccionario de portugués brasileiro engade dous novos significados para a palabra "galego". Ademais das xa existentes de "persoa loira" e "limón pequeno", indicará que tamén se refire ós habitantes de Galicia e que é outro nome para o idioma falado no brasil.

En canto a Área de Comunicación, Xosé Luis Palmeiro destacou o descoñecemento mutuo que existe entre os profesionais deste eido nos diferentes países. Segundo Palmeiro, "está todo por facer" pero existe unha grande ilusión cara o intercambio de productos e de experiencias neste eido.

Todos os coordinadores estiveron de acordo en destacar a asistencia de público, calculada en milleiros de persoas, e o compromiso de múltiples empresas privadas no patrocinio do mesmo, o que revela, segundo eles, a importancia que pode acadar a lingua no eido económico.