Ir ao contido directamente.


Carmen Penim canta sobre a represión en Herdeiras

Xénero: Cantautor | 21 / 9 / 2017

carmen_penim_herdeiras.jpg

Un libro-CD con poemas musiados e un audiovisual no que se aborda a represión franquista en Galicia. Esta é a proposta de Herdeiras o proxecto que Carmen Penim, voz do dúo 2nafronteira, presenta este sábado 23 de setembro no Teatro Principal de Compostela. O álbum conta con música de Penim sobre poemas de Helena Villar, Carmen Blanco, Eva Veiga, Marga do Val e Marta Dacosta, e inclúe varios artigos e a curtametraxe Bucle de Margarita Ledo. Financiado mediante crowdfunding, Herdeiras "fala de muller e dereitos, fala da construción da identidade, da visibilización, do sentido de herdanza, recuperando historias de mulleres resistentes e solidarias, represaliadas ás veces só por ter loitado por dereitos que hoxe consideramos obvios. E fala de memoria, porque o esquecemento non trae a paz serena que queremos, porque non nos queremos repetir e queremos sentirnos orgullosas de ser netas e fillas de mulleres fortes e dignas", segundo explica a presentación do álbum.

O veterán festival Xiria Pop pecha o verán en Carballo

Xénero: Rock | 11 / 9 / 2017

image not available

O Festival Xiria Pop de Carballo celebrará o vindeiro fin de semana unha nova edición ofrecendo dous días de actuación de bandas galegas, nacionais e internacionais. O evento, que comezou no ano 98 como unha festa vencellada á xente do equipo de balonmán local Xiria, foi crecendo e evolucionando co tempo ata ser unha cita veterana e estable da programación musical de finais do verán. A Sala Dublín acollerá os días 15 e 16 a actuación de catro bandas e un Dj cada xornada. Dúas bandas británicas, Colorama e MFC Chicken, encabezan o cartel en cada un dos días. De Londres tamén chegan Sulk e de Motpellier Les Lullies. A presenza galega a poñen os compostelán Thee Boas. Bandas nacionais como Biznaga, Los Estanques e Carolina Otero & Someone Elses completan a oferta de concertos que se celebrarán no Club Dubñin de Carballo.

Pancho Álvarez presenta Celtis Australis, quinto disco en solitario

Xénero: Nova era | 7 / 9 / 2017

not_27797.jpg

O músico porriñés Pancho Álvarez, coñecido polo seu virtuosismo nos instrumentos de corda da música tradicional e que formou parte ddos grupos Na Lúa ou Matto Congrio, saca mañá venres ao mercado o que será o seu quinto disco en solitario: Celtis Australis (Fol Música) do que xa coñecemeos o seu primeiro tema de avance : Outra mañá. Álvarez presenta neste traballo 17 temas propios nos que tamén canta as letras para cuxa escrita contou coa colaboración de escritores como Suso de Toro e Manuel Forcadela ademais de Magín Blanco. Para Celtis Ausstralis Pancho contou tamén coas colaboracións de outros músicos como Antón Seoane, Pablo Novoa, os irmáns Félix e Cástor Castro Vicente, Xurxo Núñez, Carlos Beceiro, Gutier Álvarez, David Migoya, Álvaro Vieito, Miguel Argibay, Álvaro Iglesias, Juan Álvarez, Maruxa Álvarez Solleiro e a voz de María Solleiro.
O título do disco, que se presenta en formato digipack, garda básicamente dous significados: por un lado pretende ubicar a Galicia como o sitio dos celtas do sur, en contraposición aos considerados típicos países celtas do norte como Irlanda ou Escocia, e por outro é o nome botánico do árbore “Lodoeiro” (almez ou lodón ou flor de loto para os romanos). Pancho Álvarez preséntanos un disco optimista, aberto e creativo no que se recollen ecos da nosa viaxeira historia musical e onde se encara modernidade e tradición coa mesma naturalidade.

Grandes estrelas da escena internacional do soul e R&B e bandas locais xuntaranse no VII Outono Códax

Xénero: Jazz/Blues | 6 / 9 / 2017

image not available

Completamente fieis ao estilo que ven marcando o evento desde a súa primeria edición o Outono Códax Festival ven de presentar o cartel que ofrecerá este ano en tres citas semanais de dous días cada una entre o 26 de outubro e o 18 de novembro. Fran Villasenín por A Reixa, xunto aos responsables de Raíña Produccións, Javier Freire e Martín Calviño, presentaron hoxe o cartel artístico e a loxística do festival acompañados por María Garrido, directora de márketing das bodegas Martín Códax patrocinadoras principais do evento. As achegas internacionais ao cartel cumpren as expectativas que cada ano levanta este evento e volve conseguir traer a Santiago a una lenda viva do soul, neste caso a artista británica PP Arnold, que nos anos anos 60 colaborou cos máis grandes artistas da escena mundial do rock e o soul, acompañando a Ike&Tina Turner e para aque escribiron cancións xente como Cat Stevens ou Mick Jagger (co que compartía representante) entre outros. Este será o único concertó que a artista ofreza en España e estará acompañada pola Steve Craddock Band, a banda do guitarrista de Ocean Colour Scene. Nesta cita estelar de comezo do festival, na Sala Capitol o xoves 26 de outubro, será un grupo local, os Cachas & Cousins, o que abrirá a noite. Por concertos como este o festival, ademáis do público local de Santiago e outras vilas galegas, consegue convocar cada ano público de Asturias, León e o norte de Portugal e incluso de Madrid antes as súas propostas de artistas internacionais lendarias que na mayoría dos casos non volven a facer xiras nin polo noso país nin por Europa, asegurou Fran Villasenín na rolda de prensa de presentación do VII Outono Códax. O peche do festival, o 18 de novembro o porá a banda de Houston The Suffers, una formación revelación aclamada pola crítica estadounidense que, en palabras de Villasenín, será "una das grandes sorpresas desta edición".

Chega a Compostela o WOS Festival máis experimental

Xénero: Miscelánea | 5 / 9 / 2017

image not available

Este seis de setembro abre as súas portas en Compostela o cuarto WOS Festival, nunha xeira na que a organización incide en propostas máis experimentais. A produtora Work On Sunday amplía o programa e achega un cartaz no que destacan os nomes de BFlecha, Greg Fox, Nite Jewel, Schwarz, Sensible Soccers, STA, The KVB e Western Skies Motel. Canda a eles, o proxecto enche doce espazos da cidade ata o día 10, a incluír tres estreas galegas, catro estatais e nove presentacións de discos entre os seus contidos.

Máis de corenta actuacións para a sexta edición do Festival de La Luz

Xénero: Miscelánea | 9 / 8 / 2017

image not available

O Festival de la Luz ven de anunciar o peche do seu cartel artístico e de toda a súa programación por días para súa sexta edición, que terá lugar os días 8, 9 e 10 de setembro en Boimorto (A Coruña). Rosendo, Siniestro Total, New Day, De Vacas, Chris Barron, Jorge Casal, Igloo, Leirabuxo, Iseo & Dodosound W/ The Mousehunters, Isabel Vinardell & Isabelle Ludenbach, The Special Case, Banda de Música de Arzúa e Espiño son os novos artistas que se suman á sexta edición do Festival del Luz, que xa tiña confirmados previamente outros 27 nomes. A oferta deste festival caracterízase outro ano máis por unha enorme variedade musical de xéneros, estilos e conceptos musicais entendible desde a perspectiva do cariz solidario do evento impulsado pola artista Luz Casal. Os abonos para este ano xa están esgotados pero aínda quedan entradas diarias dispoñibles. O Festival solidario, doará nesta ocasión a recadación de taquilla a Oncomet, Grupo de Oncoloxía Médica Traslacional que destinará os fondos para levar a cabo un proxecto de investigación dentro do campo da Biopsia Líquida e o tratamento do cancro. O cartel final ofrece máis de corenta artistas entre os que están: Mago de Oz, Jarabe de Palo, Rulo y la Contrabanda, León Benavente, Dr Feelgood, Guadalupe Plata, Treixadura, Diana Navarro, Os Amigos dos Músicos, Eladio y los seres queridos, Depedro, No me pises que llevo chanclas, Los Vinagres, Rufus T Firefly, La Fuga, Terbutalina, Riff Raff, Morgan, Santiaguiños de Boimorto, Tregua, Xoan Curiel, The Funkles, Aries, Tanxugueiras, Primordiais e Andhrea & The black cats. A programación complétase coas actuacións de Miguel Alberte, Superglú, Pandereteiras de Verducido e Rastakeltia, gañadores da IV edición de Cultivando Música, concurso de maquetas que cada ano organizan o Festival de la Luz e Estudios Mans. Ademais da ampla oferta musical durante os tres días do evento o público poderá gozar de numerosas actividades nas diferentes zonas do recinto, como a Carpa de Cine e Teatro ou o Mercado de la Luz. Tamén haberá unha Zona Infantil onde as crianzas terán espectáculos, obradoiros, e xogos recreativos todo o día

Festival Noroeste: o fénix que medra

Xénero: Rock | 8 / 8 / 2017

image not available

A Coruña transformarase a partires de hoxe durante seis días nun grande escenario para acoller unha nova edición do Noroeste Estrella Galicia. Un festival cunha ampla traxectoria -esta será a súa 31ª edición- que hai tres anos comezou un fondo proceso de transformación, pasando de celebrar dúas noites de concertos na praia de Riazor a espallar 200 horas de música, do martes 8 ao domingo 13 de agosto, por 15 escenarios singulares da cidade, converténdose deste xeito nun dos maiores festivais urbanos de España que congrega arredor de 70.000 persoas. A intrahistoria do evento transcorre entre capítulos do máis peculiar que inclúen desaparición circunstancial, recuperación, actuacións sorprendentes, protestas nas rúas, enfrontamentos políticos e transformación ata chegar a este momento no que se pode dicir que resulta a aposta máis forte dun concello polo formato do festival urbano.

Preséntase o cartel da Festa Cidade Europea do Viño en Cambados

Xénero: Miscelánea | 7 / 8 / 2017

image not available

A celebrarse o vindeiro 9 de setembro, a Festa Cidade Europea do Viño en Cambados será a derradeira cita do circuíto de festivais Rías Baixas Fests. Dos 8+1 eventos que se engloban nesta etiqueta amparada pola deputación Provincial de Pontevedra este é o “+1” co que se pechará un axitado verán de citas musicais. A formación vasca Belako encabeza un cartel heteroxéneo en estilos no que tamén están os cambadenses Familia Caamagno, ademais deles tamén estarán: Presumido, Ghesgha, Disco las palmeras!, Capsula, Brían Cross, Emilio José, Oh Ayatollah, Kings Of The Beach, Niña Coyote eta Chico Tornado. Todos conforman un avultado cartel para esa xornada que xa se ven de presentar completo esta fin de semana no Concello de Cambados coincidindo coa festa do viño Albariño. A Festa Cidade Europea do Viño celebra a recente consecución desa "capitalidade enolóxica" para o vixente ano pero ademais ten vocación de manterse como cita fixa anual no calendario. As once bandas ou artistas actuarán no Parque do Torrado da vila, cun programa que comezará a mediodía e se prolongará ata a madrugada. O evento terá un prezo de entrada de 10 euros a anticipada e 15 no mesmo recinto. Os menores de 16 anos poderán acceder de balde acompañados dun dos seus país ou dun adulto ao cargo.

Xabier Díaz e Luar na Lubre encabezan a numerosa presenza galega no festival de Lorient

Xénero: Folk | 3 / 8 / 2017

image not available

O Festival Interceltique de Lorient, na Bretaña francesa, leva 47 anos sendo o máis importante do mundo no que se refire á música folk bretoa e das denominadas nacións celtas das Illas Británicas (Escocia, Gales, Cornualles, Illa de Man e Irlanda) e o norte de España (Galicia e Asturias). Este ano, o festival contará con numerosa presenza desde Galicia, con arredor de 150 músicos ou bailadores, entre os que os máis coñecidos poden ser Xabier Díaz &Adufeiras de Salitere ou a veterá banda Luar Na Lubre. Nos dez días de festival, do 4 ao 13 de agosto, chegan á vila bretona máis de 4.500 artistas para participar nos máis de 120 espectáculos que se desenrrolan nos distintos espazos do festival, chegando a haber 100.000 espectadores de pago e 700.000 visitantes, o que o convirte no máis importante festival de Francia e do mundo. Nesta edición o primeiro grupo galego en tocar serán Xabier Díaz & Adufeiras de Salitre, o domingo 6 no Grande Teathrè. Tamén chegarán ao Interceltique TRIM. Este trío instrumental formado por Fernando Barroso, Pedro Fariñas e Luís Peixoto fará unha das súas primeiras aparicións europeas, nun festival no que o seu gaiteiro, Pedro, é xa coñecido ao gañar o certame MacCrimmon no ano 2011. O Espace Marine é o recinto máis grande do festival, reservado para as producións con maior sona do mesmo. Nel tocarán a noite do mércores 9 os coruñeses Luar na Lubre. Coa súa renovada formación amosarán ao público bretón a súa proposta encadrada no 30º aniversario do grupo.

 

 

 

Sponsored Links: No Frills Flyer, Freshco Flyer, Food Basics Flyer, Walmart Flyer, Giant Tiger Flyer