Os artistas saen da súa torre de marfil. Ou case, porque máis que saír, o que fan é permitir que o público poida entrar nese espazo “sagrado” como é o seu taller para ver como e onde nacen as obras. A esta iniciativa chámaselle Roteiro de Creación, cumpre tres edicións e mañá abre as súas portas en Compostela. Como novidade, este ano reflexionan sobre a arte en tempos de crise.

Durante durante as dúas primeiras fins de semana deste mes de xuño, os creadores que viven en Compostela abrirán as portas do seu taller para compartilo co público. Pero tamén para ensinarlle a comprender a arte e a gozar dela en primeira persoa. ¿Cómo? Con cursos e obradoiros diseminados por toda a cidade de Santiago e para todos os públicos.

O compoñente pedagóxico
Talleres de estampación sobre teas (Carretas, 30), de técnica waldorf (Praza do Toural), de esculturas iluminadas (Fundación Granell), de iniciación ao gravado (Taller do Paraná, Casa das Asociacións e a estación de trens de Cornes)… e tantos outros cursos, todos eles intercalados con múltiples actividades de tipo lúdico diseminadas por toda a cartografía de Santiago. Un dos puntos fortes desta iniciativa é que non se reduce a organizar actividades na zona vella (na chamada améndoa) ou no ensanche, senón que favorece circuítos diversos e habilita percorridos por outros barrios menos frecuentados.

Nesta ocasión, as responsables do Roteiro de Creación quixeron poñer o acento nas actividades de formación que tan bos resultados lle deron no 2008 (cando conseguiron 2.248 participantes) . “Esta edición pensamos que tivera maior visibilidade, para iso deseñamos un programa con moitas actividades na rúa, accións en plazas, performances, cousas participativas e especialmente para toda a familia porque pensamos que a arte é cousa de todos” afirma María Chenut, que xunto con Reina DŽHoore coordina este roteiro. Dúas artistas que acaban de poñer en marcha o Laboratorio de Creación Artística, que é a asociación ou a entidade que lle dá musculatura administrativa a esta iniciativa que arrinca mañá en Santiago.

Desde que naceu, o Roteiro perdeu a etiqueta de “contemporánea” do seu título. Para María Chenut foi unha decisión que se debe a que “o público asociaba o concepto ás galerías de arte e iso condicionaba a súa percepción”. Polo demais, nestes tres anos que leva en marcha esta proposta segue igual en canto a finalidade, pero multiplicou as súas actividades. E para o futuro, tanto María como Reina teñen moitos plans. Entre eles destaca a conexión desta iniciativa con outras semellantes que se desenvolven noutras partes do mundo. Principalmente en Bruxelas (Parcours dŽartistes de St Gilles) ou en París (Ateliers dŽArtistes de Belleville), cidades con máis de vinte anos de tradición. “Para o vindeiro ano pretendemos establecer colaboración con estas outras entidades como residencias artísticas” explica María Chenut.

Arte en tempos de crise
Como o roteiro é unha actividade moi pegada á realidade artística do momento, este ano non quixo deixar pasar a ocasión para reflexionar sobre a creación en tempos de crise. Para iso, o Laboratorio de Creación Artística elaborou unha serie de convenios con diferentes departamentos da Universidade de Santiago e de Vigo, co obxectivo de analizar desde un punto de vista científico a creación actual. O resultado é o Roteiro en estado crítico que se desenvolverá en tres sedes (Casa das Asociacións, Taller do Paraná e no espazo do Colectivo Baleiro) xa ten aberto o seu prazo de inscrición. Teófila Noemí Ruiz, coordinadora destas xornadas, explica que “queremos que se fale sobre a democratización creativa, sobre as canles de difusión, sobre o que lle ofrecen os creadores á sociedade... e todo este tipo de cuestións”.

Esta actividade conta con diferentes formatos: o de diferentes mesas redondas (sobre a creación, difusión, a mirada do crítico...), un gabinete de crise (xornadas de traballo sobre as diferentes formas de produción cultural e que está aberto só a inscritos) e unha serie de actividades creativas (na que catro artistas estarán creando en directo).

O Roteiro en estado crítico é a actividade que permite ter un espazo para a recepción, debate e produción de ideas. “No fondo, explica Teófila, pretendemos respostar á pregunta de ¿como é posible facer arte en tempos de crise?”.

Tamén che pode interesar...