culturagalega.org
culturagalega.org

inicio / noticias / A invasión dos Bolechas
Noticias

A INVASIóN DOS BOLECHAS

A serie infantil "Os Bolechas" convértese na revelación editorial dos últimos anos e finca os seus personaxes na nosa realidade cultural


5 / 4 / 2006
Santiago. Redacción

Son os protagonistas da máis nutrida serie da nosa literatura infantil. Contan cunha lexión de seguidores entre os máis pequenos sen teren máis soporte que o libro ilustrado. Cada vez tocan máis ámbitos e visitan máis lugares da nosa xeografía. Ata comezan a ter, cousa rara no noso país, os seus propios obxectos de mercadotecnia asociados. Son Os Bolechas, un auténtico fenómeno cultural.

Hai case cen títulos que recollen dun ou doutro xeito, as aventuras dos Bolechas. Cada novo lanzamento consigue unha rápida aceptación do público máis novo ata o punto de conseguir converterse en todo un fenómeno social entre os galegos máis novos sen contar apenas con apoios publicitarios. Por vez primeira no noso país, personaxes que parten dos libros para nenos conseguen os seus propios obxectos de mercadotecnia, chegan fóra das nosas fronteiras e ameazan aínda con continuar unha sorprendente expansión que arrincou hai só cinco anos.

A orixe
Todo comezou como unha iniciativa do prolífico Pepe Carreiro. "Foi un proxecto que presentei eu en A Nosa Terra", explica o autor. "Quería facer unha serie con personaxes fixos e co único fin de divertir os primeiros lectores. Ademais, quería fuxir de fantasías e de leccións morais, a idea era só que pasasen un bo momento a ler o libro e que as aventuras fosen as que teñen os nenos todos os días coas billas, as camas ou no parque". Unha familia de seis irmáns, Carlos, as xemelgas Loli e Pili, Braulio, Sonia e Tatá, canda ao cadelo Chispa, foron os protagonistas desta iniciativa, que axiña conseguiu unha boa aceptación entre os máis novos. Desde o primeiro "Os Bolechas fan maxia" do ano 2000, os irmáns teñen feito actividades tan variadas como lavar o can, mercar roupa, ir de excusión, de pesca, ao médico, ao supermercado, á praia, á aldea, ao circo, ao cine e á piscina. Carreiro meteu os irmáns nun parque de atraccións, en ascensor e en caravana, nun festival e mesmo nunha hamburguesaría. Tamén fixeron un carro, xogaron co computador, ás agochadas, ao baloncesto, perderon o can, namoraron, rifaron, fixeron pis e realizaron aínda un bo lote de actividades máis nun total de trinta e dous títulos da colección principal.

Éxito e ritmos
"Teñen moi boa acollida. Aínda hai pouco estiven en Santiago e quedei sorprendido pola cantidade de nenos que viñeron para que lles asinase os libros", apunta o autor. "Con outros traballos ves que son os pais os que din que gusta, pero aquí ves que son os propios nenos os que saben os nomes dos personaxes, que lles gustan e que mesmo dormen abrazados aos libros. Ata hai rapaces que non saben ler pero que os coñecen porque os pais lles contan as historias". Cada unha destas obras, feitas a bo ritmo, lévalle a Carreiro uns dez días. De calquera xeito, desde o pasado ano recoñece que conta cun colaborador para lle dar cor aos volumes e manter o ritmo de edición. Este traballo frenético permitiu botar a andar "Os Bolechas queren saber...", unha colección que ten un enfoque máis didáctico. "Máis do que contar unha aventura trátase de amosar como funcionan as cousas", di Carreiro. Deste xeito, os irmáns xa teñen explicado o aire, a auga, a enerxía, o lixo, o solo, un castro, ou como funciona un parque de bombeiros, a policía local ou un acuario a través desta colección paralela, que xa rolda os quince títulos. Por se fose pouco, hai aínda a serie "Os Bolechas descobren a natureza" con títulos coma "A carballeira", "A lagoa", "A marisma" ou "O río". Tamén existe a serie de tres tomos "Os bolechas coidamos a..." destinada á educación ambiental dentro do proxecto Axenda 21 escolar.

Viaxes
Non contentos aínda con tanto traballo, estes personaxes decidiron visitar un bo lote de localidades do noso país na colección "Os Bolechas van de viaxe" que xa chegou aos 14 títulos. "Esta serie foi unha idea da editorial, que quería poñelos a viaxar por cidades e vilas e aproveitar o patrocinio dos concellos", recoñece o autor. "Eu ao principio non tiña moi clara a idea, pensaba en metelos nun tren turístico e pasealos polas cidades, pero ao final optei por facer unha aventura calquera que se desenvolvese nun lugar concreto". O álbum "Buscando a Linda en Pontevedra" abría as aventuras locais dos Bolechas, que teñen visitado xa Lugo, Amaía, Poio, Ferrol, Porriño, Redondela (onde coñeceron a célebre Coca), Baiona, Ortigueira (no festival celta, como non), Gondomar, Tomiño, Muros e Nigrán. Aínda neste 2006 tiveron xa tempo para coñecer a festa da Reconquista en Vigo, o Río Lérez en Pontevedra (dentro da campaña "Puro Lérez" de rexeneración do curso) e, neste mesmo abril, Compostela. "Ao final de cada libro van reproducidas as ilustracións cos nomes das prazas e das rúas que saen no libro, para que os nenos as identifiquen e algúns ata encontran a súa casa", recoñece o autor. A iniciativa de facer cada un destes álbums alterna entre a propia editorial e os diferentes concellos, segundo recoñece o autor. "Ou ben a editorial visita o concello e lle propón un álbum ou ben é o concello que o solicita. Por exemplo no caso de Muros foi que me achegara eu a dar unha charla e o concelleiro díxome que a ver cando ían os Bolechas por alí, púxose en contacto coa editorial, e de aí saíu o libro".

Cifras de edición
A tiraxe mínima dun título dos Bolechas é, segundo aseguran desde a editora, tres mil exemplares, e o máis habitual son edicións de entre cinco mil e sete mil, sen contar con edicións patrocinadas da serie das viaxes. "Aí xa depende de como fose o acordo e de cantos queira tirar o concello", sinala Carreiro. "Por exemplo para o libro sobre a Reconquista de Vigo fixéronse uns quince mil porque querían repartilo de xeito masivo. Logo de cada un dos títulos patrocinados, que se fan para o concello en capa branda, a editora fai pola súa conta unha edición en capa dura que incorpora á colección e que pon á venda". Ademais do que se publica en Galicia, a serie xa ten chegado a Portugal co título de "Os Bochechas". "Fíxose unha venda de vinte e catro títulos con tres mil exemplares cada un, o que supón 72.000 exemplares o pasado ano", explica Pepe Puga, de A Nosa Terra. "Agora quérennos facer outra compra igual". O éxito destes irmáns no país veciño é tal que o propio Ministerio de Educación e a Secretaría de Medio Ambiente fixeron unha edición dos libros sobre a natureza como material recomendado nas aulas e desenvolveron a partir deles un proxecto de educación ambiental. Tamén no Concello de Vigo levan empregando estes personaxes para as súas campañas de educación viaria desde hai xa cinco anos, cuns 30.000 exemplares repartidos de "Os Bolechas van pola rúa".

Produtos relacionados
O éxito destes personaxes está a dar na aparición de máis produtos relacionados con eles. Por unha banda a editora publicaba a finais de 2005 a serie de sete volumes "Eu son..." no que cada un dos personaxes fala dos seus gustos, aspiracións e características particulares. "A idea é que os rapaces aprendan a se recoñecer en galego. Con isto queremos facer unha campaña grande en centros escolares", sinalan desde a editora. Canda a eles, chegaron ás librarías as seis "Historias Animadas", nos que se pode ver os personaxes moverse ao pasar as follas. O público ten a disposición, cos mesmos protagonistas, unha serie de dezaseis cadernos para dar cor, lapis, mochilas e cadernos coa imaxe destes rapaces. Aínda este Nadal a Secretaría Xeral de Política Lingüística repartía 185.000 postais para felicitar as festas entre os escolares do país con eles como motivo. A editora decidiu seguir este camiño e comercializa xa dezaseis modelos de postais para as máis variadas ocasións, e hai lotes con oito convites para festas de aniversario. "O que queremos é normalizar cos Bolechas o que xa hai noutros mercados", destaca Puga.

Plans de invasión
Ante tanta aceptación non nos debe estrañar que exista un proxecto para facer unha versión animada da serie. "Levamos máis dun ano a lle dar voltas a iso. Penso que hai diversas propostas para facelo, pero o máis complicado é o orzamento, unha serie deste tipo é moi cara", sinala o autor. O salto a Internet está tamén nos planes de A Nosa Terra. "Imos facer un portal que se chamará `O mundo dos Bolechas´ onde vai haber xogos, unha especie de enciclopedia, fondos de escritorio, debuxos e mesmo un club", anuncia Puga. Antes que iso, a editora anuncia dúas novas series. "Imos lanzar unha que se chama `Eu cumpro...´ e que vai ir recollendo as diferentes idades. Serán libros onde estes personaxes fan festas de aniversario cos seus amigos, e sairán nun formato máis grande" destaca este editor. "Logo, para alén da edición de viaxes, imos facer outra máis tipo guía na que os irmáns realizan pequenas viaxes de fin de semana e escriben un diario sobre o que fan en cada sitio. Terá dez libros e amosará percorridos máis amplos e con máis información sobre zonas do país como a Ribeira Sacra, a Costa da Morte ou Os Ancares". Un especial sobre os Dereitos do Neno editado co apoio da Vicepresidencia da Xunta e novos exemplares das diferentes coleccións irán completando ao longo do ano este mundo dos Bolechas. Entre o máis inmediato, imos ver novas aventuras en Cangas e en Monforte, e dous novos libros da colección xeral. De calquera xeito, a historia continúa, e desde a editora xa nos adiantan que están a barallar a posibilidade de facer descargas para móbiles con estes personaxes. A invasión só acaba de comezar.

Tamén che pode interesar...

Séguenos en

Hoxe en culturagalega.org

Presenta o disco con dous concertos, venres 19 en Vigo e sábado 20 en Compostela
Treixadura celebra 25 anos de música con Vendima tarda
Multiplícanse as cancións que teñen por protagonista o carboeiro neste Nadal
Dosier: Escoitar o Apalpador
As votacións públicas están abertas ata o 15 de xaneiro
O Resurrection Fest é finalista en 8 categorías dos Premios Fest
A Asociación Española de Estudos Anglo-Norteamericanos premia por segunda vez a Jorge Luis Bueno
A versión galega do Sir Gawain leva un premio estatal de tradución
Convoca para o 8 de febreiro unha manifestación ante os últimos datos sobre o galego
Queremos Galego chama a se mobilizar pola lingua
Xuntan tres millóns e medio de euros en axudas
Catro filmes do audiovisual galego reciben axudas para a amortización
Korn, Mötorhead e Refusen encabezan un cartel de 48 bandas
O Resurrection Fest celebrará 10 anos por todo o alto
O total concedido foi de 909.000 euros
As editoras galegas reciben case 50.000 euros nas axudas estatais á edición
Descobre como soan os grupos galardoados nos II Premios da Música Martín Codax
Sons gañadores
A sesión conmemorativa celébrase mañá no Museo Provincial de Lugo
A revista oral O Pazo das Musas celebra dez anos
Debuta cun álbum homónimo dedicado a propostas alternativas do hip hop
A discográfica Língua Nativa nace centrada na lusofonía
O galego estúdase en trinta e sete universidades de todo o mundo
A lingua botada a andar
O plan de situar o Bernardo Alfageme nunha rotonda abre o debate sobre o destino destes bens
Dosier: Patrimonio marítimo
O monumento está a verse afectado, especialmente nas súasvs pinturass.
Bóveda sufre problemas de humidade e de luz
A Asociación de Gaiteiros Galegos cumpre 25 anos como un referente no panorama musical do país
Punteiros de encontro
Zona RSS | Aviso legal | Contacto | O equipo do portal | Licenza de uso | Contactar coa redacción: redaccion@culturagalega.org I T: +34 981 957202 | F: +34 981957205 |
Logo do Consello da Cultura Galega
Consello da Cultura Galega. | http://www.consellodacultura.org
Pazo de Raxoi, 2 andar. 15704 Santiago de Compostela (Galicia)
Tfno: 981957202 | Fax : 981957205 | e-mail: redaccion@culturagalega.org
culturagalega.org
Consello da Cultura Galega. | http://www.consellodacultura.org
Pazo de Raxoi, 2 andar. 15704 Santiago de Compostela (Galicia)
Tfno: 981957202 | Fax : 981957205 | e-mail: redaccion@culturagalega.org