O tres dos sete

Por fin. Logo de dous anos de expectación, o terceiro traballo de Berrogüetto sae á venda. "Hepta", como xa temos avanzado neste mesmo portal, está a chamado a ser moito máis que un disco.
A intervención artística do grupo con Georges Rousse na vella fábrica de Sargadelos, o concerto de verán e Ourense cos sete músicos de todo o mundo que colaboraron na gravación, a páxina web do grupo ou o video musical. Todo son pasos dentro do mesmo proxecto, unha homenaxe ó número sete que vén dada tanto polo número de membros do grupo como polas notas musicais, as cores básicas ou toda a simboloxía que se lle queira buscar.

Falando do disco
Afortuanadamente para os afeccionados, "Hepta" contén máis de sete cancións, de feito son trece, a última das cales "Azul Graso", hai que escoitar con atención e ata o final. Iso sí, todas as cancións posteriores á septima están numeradas coa suma "7+X".
O CD contará cunha edición limitada en caixa que inclúe un libreto de vinteoito páxinas e unha postal nos que recollen diferentes fotografías da intervención artística que o grupo realizou co francés Georges Rousse en Sargadelos. Ademais, desde a discográfica Boa-Music prometen sorpresas para este formato.


Calidade mantida
Dentro do disco atopamos o que todos os afeccionados agardaban. Máis Berrogüetto. Co seu estilo inconfundible, cos constantes xogos de palabras e de conceptos nos títulos e na música, o grupo reafirma a súa identidade e a súa vocación experimental dentro do folk.

Así, cancións coma "Galim@tias.tacom", ou "Azul Graso" amósannos a vontade innovadora dos sete músicos, mentres con outras coma "Cantos de Monzo" ou "Alquimista de soños" atopámonos máis apegados ás formas de canto tradicionais.

As melodías, como é habitual no grupo, oscilan entre uns tempos de lentitude e tenrura e unha forza rítmica, que se desenvolven contanto máis coas guitarras que en anteriores traballos. O emprego de instrumentos novos, vidos de todo o mundo, achegan novas formas de sonoridade que o grupo acada integrar perfectamente no seu estilo habitual.


Sete colaboracións
O disco contou con colaboracións internacionais de altura provintes de todo o mundo. Así o armenio Jivan Gasparian achega a súa interpretación do duduk. Desde Suecia, Markus Svensson toca a nyckelharpa en "Setestrelo", e desde Hungría, Kalman Balogh achega ó disco o seu cimbalom en "Azul Grasso". Máis de perto, Kin García toca o baixo en "Alquimistar de soños" e "Azul Graso", Xavier Díaz pon a súa voz en "Cantos de Monzo" e Luis Palacín achega a súa harmónica.

Os créditos de cada unha das cancións e moita máis información sobre o disco poden lerse na recén estreada web do grupo:

http://www.berroguetto.com

O anterior disco de Berrogüetto en RCG

Reportaxe sobre o proxecto Hepta

Dous videos da presentación de HEPTA en Radioya.com