O primeiro disco do trío Trasmundi, Raianos (Clave Records, 2001) poderíase definir como folk clásico, tendo en conta a pureza dos seus timbres e o achegamento a unha instrumentación moi limpa de brillos acústicos, ademais da formación clásica dos compoñentes.

Raianos é un disco para escoitar, un proxecto conxunto deste tres músicos que apostaron por esta idea global na que están interrelacionadas tamén a maquetación, as ilustracións, fotografías e os textos. As composicións, arranxos e producción artística son tamén un traballo conxunto da formación. O grupo Trasmundi constitúese no ano 1998 coa unión de Moisés Quintas, Rosa Gayoso e Xosé Manuel Fernández. Rosa canta ademais de tocar o violín e a zanfona, intérprete de formación clásica ten colaborado con formacións folk como Liorna, ademais de participar na gravación do disco Santiago dos Chieftains. No acordeón, no piano e o cargo dos teclados Xosé Manuel Fernández, que foi membro do grupo Arco da Vella moitos anos, colaborando tamén con outras formacións clásicas e grupos de folk . O terceiro elemento de Trasmundi é Moisés Quintas, que tamén formou part de Arco da Vella ademais de colaborar con formacións como Xeque Mate (actualmente Camerata Meiga).

A aposta polo sentido clásico da escoita musical que Trasmundi fan en Raianos ten tamén unha implicación na actual tendencia de recuperación da música tradicional e non pode ser entendido sen ter a esta en conta. A variedade instrumental do disco, con gaita, frautas, violín, zanfona, acordeón, e percusións, contribúe a este ton tradicional que, como eles recoñecen, "vai paralelo" ás súas vidas e "xa está moi presente á hora de compoñer", dando pé a multitude de ritmos tradicionais de polcas, nanas ou alalás, mesturados co virtuosismo musical máis clásico. O disco, gravado e mesturado en ELKAR entre abril e maio de 1999, está producido por Jean Phocas e conta coas colaboracións de Rafa Cachafeiro no violín, Ton Risco na batería e percusión e David Cid no baixo.

O disco inclúe un texto xustificativo no que vai pasando por todos os nomes das cancións establecendo un fío conductor que fai da idea de Raianos un discurso completo: "Éche certo que os galegos temos un espírito ou alma universal..., trasmundana. Seica un día, por mor dun meigallo, unha tarabela espantou o noso pensamento e espallouno polo mundo. Para algúns foi unha viaxe de ida e volta, unha dor xorda esquecida nas bagoas dun churumbele. Mais moitos non voltaron. A súa velocidade de escape non chegou dabondo para fuxir daqueles mundos e regresar entre nós. Outros permanecen superpostos dacabalo de dous mundos, na percura dun novo meigallo que lles permita volver lembrando unha nana esquecida nos seu pensamentos infantís. Son almas que desexan atopar na noite limpa e escura o camiño de estrelas que os guíe de volta. Almas raianas."

+Páxina web de Trasmundi