En 1993 aparecía un novo grupo no panorama da música folk e tradicional, eran Fía na roca e sorprenderon pola súa calidade, o seu son elegante e os seus arranxos que supuxeron un ar de renovación na música tradicional de xeito paralelo a outras formacións do momento como Luar na lubre. A aparición de Fía na roca foi recibida con excelentes críticas. Sorprendeu o grupo polo seu estilo que manexaba a tradición como un elemento máis a combinar coas ideas própias e as máis diversas influencias da vangarda, o jazz ou mesmo o rock e o funk . A diversidade de influencias, xunto coa riqueza sonora empregada nas distintas composicións, constituíu desde o comezo un dos seus sinais de identidade, conseguindo un resultado final coherente e con carácter.

No 2001 publicase o seu terceiro e último disco ata o momento, "Contravento" (Ceyba Music, 2001), coa colaboración do fotógrafo Xosé Garrido no apartado gráfico. A súa principal novidade é a participación da nova cantora galega Sonia Lebedynski, incorporada como sétimo compoñente da formación, que estaba integrada por Xabier Bueno, Carlos Castro, Cris Gándara, Giao Rodríguez, Roberto Santamarina e Xosé Ramón Vázquez. O disco contén doce pezas, a metade delas saídas da tradición popular galega e unha máis da tradición portuguesa, as outras cinco, entre as que está a que da título o album "Contravento", son composicións própias A discografía desta formación consta ata o momento de tres traballos. "Fía na roca" (Corda frouxa música, 1993) foi o seu álbum de estrea. Con el conseguiron chamar a atención da prestixiosa cadea británica BBC, que escolleu a súa música como banda sonora do programa co cal se promoveu o Xacobeo 93 en toda Europa a través da cadea Eurochannel. En 1997 edítase o seu segundo traballo "Agardando que pase algo" (Resistencia 1997) no que colaboran co pintor Xoán Guerreiro, que simultaneamente monta unha exposición itinerante co mesmo título do disco. Pouco despois desta publicación, a súa música foi escollida para formar parte dunha selecta compilación que, baixo o título de Celtic Twilight - Celtic Planet, foi editada en Estados Unidos e a Unión Europea.

O diario de Contravento
As incidencias de vida deste recente disco conforman un diario que garda no seu haber o galardón ao Mellor disco galego do 2001 por Radio Ecca e Segundo Mellor disco galego do 2001 segundo o xornal La Opinión. Ademais, con "Contravento", novamente, o Camiño de Santiago entra en contacto coa música de Fía na roca, pois unha producción da televisión xaponesa "Aichi TV" utiliza Contravento como banda sonora da serie baseada na obra do escritor brasileiro Paulo Coelho "O diário de um mago", na cal relata a pelegrinaxe que o seu autor realizou en 1986 ao longo do Camiño de Santiago. Fía na roca intervén tamén nun dos capítulos desta serie interpretando o tema "Baile de Pandeiras" e entrevistándose coa estrela da televisión xaponesa Fumi Dan. Tamén durante a xira de presentación de Contravento, no verán de 2001, coincidíu a formación galega coa banda de Quebec "La Bottine Souriante" no Festival do Mundo Celta de Ortigueira. Das boas relacións que xurdiron entre eles resultou a gravación dun documental dirixido por Rénald Bellemare sobre a xira mundial que celebraba o 25 aniversario do grupo de Canadá. No programa, emitido por Tele-Quebec en xaneiro do 2002, Sonia Lebedynski interpreta a dúo un tema co cantante solista da "Bottine" Yves Lambert.

+Páxina web oficial de Fía na Roca