Grupo folk xurdido da xuntanza de seis rapaces de Bueu e dous da montaña luguesa do Incio, Quempallou caracterízase polo espíritu festeiro e a raiz tradicional, combinando no seu repertorio muiñeiras, xotas, valses, polcas, pasodobres... A calidade da música destes mozos valeulles o triunfo no II Certame para grupos folk noveis convocado pola compostelá Radio Obradoiro, un recoñecemento que obtiveron por unanimidade do xurado, composto por Anxo G. Pintos (Berrogüetto), Uxía Pedreira (Chouteira) entre outros prestixiosos músicos.

Os oito componentes da banda acompañan o cancioneiro popular -mesmo aportando innovadores arranxos a cantigas de escarnio- coa composición orixinal, pero sempre cun marcado obxectivo: a festa. A música de Quempallou está feita para bailar.

A historia ata agora

Xuntos desde a primavera do 99, levan máis de tres anos tocando por Galicia adiante entre evocadores aturuxos e enerxéticos directos. Os festivais Folk (Vilariño, Hío, Cangas do Morrazo), do Marisco (O Grove), "O galego nas ondas" (Compostela), da Gaita Grileira (Vigo), do Aturuxo (Bueu) son só algúns dos lugares onde teñen actuado. Pero a proposta musical de Quempallou chega alén das nosas fronteiras: En Portugal contaron con eles para a I Juntança de Gaiteiros de Pinhal Novo e para o II Festival de Música tradicional de Masedo dos Cavaleiros. E na veciña Asturias, que incorporan tamén como legado sonoro nas súas gravacións, gañaron o 2º premio no II Concurso de Música Folk Cuartu los Val.les en Navelgas, Tinéu.

Teñen moi claro o que procuran: "tentamos traballar sobre os ritmos tradicionais galegos conservando a súa frescura orixinal". Pretenden ante todo que a concurrencia dos seus concertos dance sen parar, "sexa da idade que sexa". O seu instrumental, o máis autóctono posible, só se ve sorprendido pola inclusión dalgún que outro instrumento alleo pero enriquecedor, como poden ser o mandocello (buzuki), o piano ou a frauta de bico. Cunha simpática portada do seu primeiro CD -na que se ve un señor e señora acompañando un Seat 600... ¡e un elefante!-, Quempallou non perden o humor, afirmando que "somos un perigo cos instrumentos ó lombo, e moito máis enriba dun escenario".

O grupo

Quempallou son:

Xoán Manuel Novas (Mui): Gaitas, coros.
Guillerme Ignácio: Gaita, frautas, percusións, voz
Roi Maceda: Acordeón, coros
Álex Torresquesana: Mandocello, piano, coros
Guillerme Lamosa: Guitarra portuguesa, gaita
Bernardo Pena: Tamboril, percusións, coros
Anxo Novas: Percusión, coros
Xosé Maceda: Bombo, coros

+Letras e contactos de Quempallou