Quinta Feira, De seu

A casualidade reuníu en 1997 enriba dun escenario a Tito maqueira(guitarra), Marcos Seixo (zanfoña e percusións) e Toño Domínguez (frauta e voz) para dar un concerto de intención case que anecdótica. A boa comunicación que acadaron entre eles levounos a comezar a cavilar nun proxecto de formación musical estable. Aquel día da casualidade era un xoves, e os músicos decidiron lembrar a casualidade do encontro dándolle ó seu proxecto o nome do día, Quinta Feira. Agora, tres anos despois editan o seu primeiro disco "...de seu" (Sons Galiza, 2000) .

Letras de escritores e trobadores

En Quinta Feira conviven cordialmente o jazz, o rock, a bossa, aires portugueses e, como non, dende a referencia da música tradicional galega. Outro rasgo que tenta definir ó grupo é a importancia que, pouco a pouco, cobra a voz na súa producción musical. A metade das cancións do seu disco son instrumentais, mentres que as letras das outras cinco baséanse en textos de autores galegos. O grupo usa versións tanto de autores contemporaneos (Roberto Blanco Torres, Castelao) coma de trovadores medievais (Xoán de Cangas, Mendinho, Martín Codax). A presentación do disco "...de seu" fíxose o pasado 20 de outubro no Teatro Principal de Pontevedra, co apoio da Concellalía de Cultura do concello da cidade do Lérez. O disco foi froito do traballo continuado durante tres anos desta formación.

A traxectoria de Quinta Feira centrouse ó redor de concertos intimistas en pequenos espacios, ademais dos festivais musicais, coma no Certame de Música Xove San Roque 99 no que acadaron o 1º premio. A formación caracterízase por unha vocación didáctica que se materializou cando, en 1998, fixeron unha xira por centros de ensino e asociacións culturais. O espectáculo didactico que presentaron entón, no que se misturaban música e literatura, facía un percorrido pola historia e cultura dos trobadores medievais.