Rodrigo Romaní, Albeida

O primeiro disco de Rodrigo Romaní en solitario, Albeida (Boa Music, 2000), presentouse en outubro no Centro Galego de Arte Contemporánea de Santiago. O album do antigo compoñente e co-fundador de Milladoiro levantou moita expectación, xa que supón a volta ós escenarios deste arpista despois da súa separación do mítico grupo. Romaní está a presenta-la súa música en concerto nestas datas en varias cidades.
Con Albeida, Romaní pretende facer unha homenaxe á paisaxe humana do sitio onde vive, un lugar que para o músico está "cheo de connotacións imaxinativas e poéticas"

A alongada sombra de Milladoiro
Resulta imposible falar deste primeiro disco de Romaní, sen facer mención algunha á súa etapa en Milladoiro. A separación foi moi comentada no seu momento e Romaní sabía moi ben que cando presentase este novo proxecto musicaL en solitario serían moitas as veces que lle preguntarían polo tema. Pero Rodrigo comeza unha nova etapa e quere deixar clara a separación con todo o que fixera antes "teño ganada a miña libertade a base de traballo".

Un traballo persoal
Rodrigo non asegurá a continuidade desta etapa en solitario. "Quería facer todo o que non fixera antes en 22 anos, porque non lle podía impor ós demais o que eu quería", explicaba Romaní na presentación de Albeida. Na escoita do album pódense recoñecer , lóxicamente, eses fluxos de son que corrían entre Rodrigo e o seu antigo grupo Pero existe a diferencia que da un traballo persoal, concebido e na súa integridade por este músico, actual director do Conservatorio de Música Tradicional da Universidade Popular de Vigo. Nas catorce pezas que o compoñen percórrese un abano hetereoxéneo e enriquecedor de sons que os arranxos de Romaní enlazan, ademáis da novidade que supón o seu protagonismo vocal como cantante .
Albeida está cheo de colaboracións de amigos e compañeiros de profesión, Susana Seivane, Anxo Pintos, Maximino Zumalave, Laura Quintillán, ademais da Orquesta Sinfónica da cidade de Praga, a Orquestra Camerata Viguesa, o Coro fiadeiro e a Agrupación Treixadura. Todo un abano de colaboracións que arroupan este traballo facendoo menos solitario.

Así se fixo... Albeida
A gravación do disco tivo lugar nos estudios As Galesas (Outes, A Coruña) e na Casa de Tolos (Gondomar, Pontevedra), Todo o proceso, tanto de creación como de gravación quedou recollido nun documental realizado por Suso Iglesias, o director do Xabarín Club (tvg) e con Victorinio Lourido na cámara. Imaxes da elaboración, e comentarios dos colaboradores e amigos de Rodrigo aparecen neste vídeo de media hora de duración. En primicia para a rede podes ver dende esta páxina de RadioCG un resumo de quince minutos que se preparou para a presentación do disco ante os medios. Preme na imaxe para velo.